#生物觀察日記
20210317
《老竇的哲學》

我有一...

#生物觀察日記
20210317
《老竇的哲學》

我有一日放工，夜晚12點幾返到去屋企，老竇喺度舉緊瓦楞，1009～1010⋯⋯咁我如常冇嘢地返入房，坐喺書枱開始做嘢啦⋯⋯諗諗吓越諗越唔對路，1010？即係話佢已經做咗1000下？忍唔住出去問老竇⋯⋯因為一日裏面做咁多下就實在唔係太健康，而且條友做嘅姿勢又唔完全正確，我講咗好多次唔好fing個啞鈴，成日舉起右邊嗰個嘅時候就靠fing左邊個離心力去帶動右手，你咁樣做1000下一定勞損！點知我出到去佢話佢冇做到1000下，佢只係由第一次下開始數，即係話我踏入門口果一刻佢只係做咗9下⋯⋯好無謂，我問佢點解要咁樣做，佢話本來諗住由第500下開始數，但係咁樣就會好難記數到去邊，所以就有1000開始數，你見啦繼續九唔搭八，最大嘅問題係點解要1000開始數呀嘛，你明明都冇做到！佢話咁樣比較有鼓舞性，會有動力去繼續做。

我諗起有一日見到有一間舖頭，佢嘅裝修係一間老字號咁樣，招牌上面寫住祖傳三代，招牌嘅右下角有個細細的括號寫住（第一代），即係創辦人打算將呢門生意傳三代嘅，但係而家只係第一代啫，至於傳唔傳到落去，就係後話啦，估唔到世界上有人會同我老竇有同樣嘅諗法，於是我問個老闆咁樣改名會唔會觸犯商品說明條例，點知個老闆話唔係，佢話呢一間係第一代開嘅分店，第二代同第三代開嘅分店唔喺呢一區，即係話佢哋係三代同堂，仲要每人都有一間舖，果然我就知道！冇人會同我老竇有同樣嘅諗法！

我有時都分唔到到底我老竇係一個乜嘢人，佢到底係執着吖定係冇乜所謂呢？點解地氈底要寫個底字喺度呢？你覺得有人會反轉張地氈黎用咩？你寫個底字喺底都算啦，點解要喺個地氈面寫個面字呢？點解我哋每一隻襪嘅襪頭都要寫住我哋嘅英文名頭一個字母呢？點解要將我條Star Wars底褲寫過N寧係中間變咗Star n wars底褲呢？點解寫寫下直頭換咗做寫成個中文寧字呢？個規則到底係咩？到底算係執着定係冇所謂啊？點解鍾意食菠蘿包但係唔肯食墨西哥包呢？點解會買大麥包但係唔肯買細麥包呢？點解每次話不如出街食，食好啲嗰日就會去日本餐廳，但係去到日本餐廳對住啲魚生又會話文明人係唔會食未煮過嘅食物呢？到底係執着啊？定係冇乜所謂呢？點樣㗎？

我望住我老竇有時覺得我未來係咪都係咁，定係其實我而家已經係咁，自己定立好多規則，但係嗰啲規則有時又好浮動，好似又係，例如專登揀好辛苦嗰日去跑步，等自己覺得跑步辛苦啲，本身嘅工作都冇咁辛苦嘅錯覺，但係加埋就超級辛苦，而且絕對唔係錯覺；買布甸嘅時候如果買二送一，就會專登買一隻自己冇咁鍾意嘅口味，覺得自己食一隻唔鍾意嘅味嘅布甸都算係捱苦吖，然後獎自己食一隻自己鍾意嘅味道，咁樣計落我又唔會過分優待自己，但係事實上我又食咗兩個布甸喎！我自己都有呢一啲我自己聽落非常之科學，但係講出黎都係冇人能夠理解嘅規則，雖然我想講我諗每個人都有少少呢一啲規則，每個人都有少少奇怪，但係我能夠好深入去貼近生活，知道佢哋習性嘅人就只有我自己個家人，所以經過一番觀察之後，我都實在係好難判斷到底自己係唔係一個奇怪嘅人，不過算啦，我見我老竇咁樣都可以維持到60年，都叫冇穿冇爛，或者人哋點樣睇都真係唔係太重要，都係將呢啲煩惱人生嘅時間，攞去選擇今晚要食咩口味嘅布甸啦。我最憎咖啡布甸，不過應該都會買一個，如果有買二送一嘅話。

---